ന്യൂഡല്‍ഹി: ഗുജറാത്തില്‍ നിര്‍ദിഷ്ട വിമാനത്താവളത്തിനുള്ള കരാര്‍ അനില്‍ അംബാനി സ്വന്തമാക്കി. രാജ്‌കോട്ടിലെ ഹിരാസറില്‍ വിമാനത്താവളം നിര്‍മ്മിക്കുന്നതിന് റിലയന്‍സ് ഇന്‍ഫ്രാസ്ട്രക്ചറിന് 648 കോടിയുടെ കരാര്‍ നല്‍കിയത് എയര്‍പോര്‍ട്ട് അതോറിറ്റി ഓഫ് ഇന്ത്യയാണ്.
എല്‍ ആന്‍ഡ് ടി, അഫ്‌കോന്‍സ്, ദിലിപ് ബില്‍ഡ് കണ്‍സ്ട്രക്ഷന്‍സ്, ഗായത്രി പ്രൊജക്ട് തുടങ്ങി ഒമ്പതോളം കമ്പനികളെ പിന്തള്ളിയാണ് അനില്‍ അംബാനിയുടെ റിലയന്‍സ് ഇന്‍ഫ്രാസ്ട്രക്ചര്‍ കരാര്‍ സ്വന്തമാക്കിയത്. സാങ്കേതിക മികവില്‍ 92.2 എന്ന ഉയര്‍ന്ന സ്‌കോറാണ് റിലയന്‍സ് ഇന്‍ഫ്രാസ്ട്രക്ചര്‍ നേടിയത്.
അഹമ്മദാബാദിനെയും രാജ്കോട്ടിനെയും ബന്ധിപ്പിക്കുന്ന ദേശീയപാതയുടെ സമീപത്താണ് വിമാനത്താവളം നിര്‍മിക്കുന്നത്. രാജ്കോട്ടില്‍നിന്ന് 36 കിലോമീറ്റര്‍ അകലെയാണു ഹിരാസര്‍. 30 മാസത്തിനുള്ളില്‍ വിമാനത്താവള നിര്‍മാണം പൂര്‍ത്തീകരിക്കണമെന്നാണു കരാര്‍.
