25
Wednesday
November 2020

സൂര്യാഘാതത്തില്‍ നിന്നും കന്നുകാലികളെ രക്ഷിക്കാം

Google+ Pinterest LinkedIn Tumblr +

തൃശൂര്‍ : വേനല്‍ കടുത്തതോടെ കന്നുകാലികള്‍ക്ക് സൂര്യാഘാതമേല്‍ക്കാനുളള സാധ്യതകള്‍ ഏറെയെന്നു മുന്നറിയിപ്പു നല്‍കി ജില്ലാ മൃഗസംരക്ഷണ വകുപ്പ്. വേനലില്‍ വിവിധ രോഗസാധ്യതകള്‍ കൂടുന്നതിനാല്‍ കന്നുകാലികളെ പരിചരിക്കുന്നതില്‍ കൂടുതല്‍ ശ്രദ്ധ ചെലുത്താനും മൃഗസംരക്ഷണ വകുപ്പ് കര്‍ഷകര്‍ക്ക് നിര്‍ദ്ദേശം നല്‍കി. വേനലിലെ ഉയര്‍ന്ന താപനിലയും അന്തരീക്ഷ ഈര്‍പ്പവും മൂലം അസുഖങ്ങള്‍ വരാതിരിക്കാന്‍ മൃഗങ്ങള്‍ക്ക് പ്രത്യേക പരിചരണം നല്‍കണം. സ്ഥിരമായ പാലുല്‍പ്പാദനവും രോഗപ്രതിരോധ ശേഷിയും നിലനിര്‍ത്താന്‍ കര്‍ഷകര്‍ പരിപാലന രീതിയില്‍ കൂടുതല്‍ ശ്രദ്ധ ചെലുത്തണമെന്നും ജില്ലാ മൃഗസംരക്ഷണ ഓഫീസര്‍ അറിയിച്ചു.

കന്നുകാലികളെ സൂര്യാഘാതത്തില്‍ നിന്നും സംരക്ഷിക്കുന്നതിനായി തണുപ്പുള്ള മേച്ചില്‍പ്പുറങ്ങളില്‍ തീറ്റനല്‍കാന്‍ ഇറക്കുക. രാവിലെ 9 നു മുന്‍പും വൈകീട്ട് 5 ന് ശേഷവും മാത്രം മേയാന്‍ വിടുക. സാധാരണ ദിവസത്തേക്കാളും കൂടുതല്‍ ജലം ആവശ്യമാണെന്നിരിക്കെ ദിവസവും 130 ലിറ്റര്‍ വെള്ളം പശുക്കള്‍ക്ക് നല്‍കണം. തൊഴുത്തില്‍ കന്നുകാലികള്‍ക്ക് ഏതു സമത്തും ലഭ്യമാവുന്ന തരത്തില്‍ ജലലഭ്യത ഉറപ്പുവരുത്തണം. തൊഴുത്തിനു ചുറ്റും തണല്‍ മരങ്ങള്‍ വച്ചുപിടിപ്പിക്കുക. തൊഴുത്തില്‍ അന്തരീക്ഷതാപം കുറയ്ക്കുന്നതിന് തൊഴുത്തിനു മുകളില്‍ തെങ്ങോല, ചാക്ക് എന്നിവയിട്ട് ഇടയ്ക്കിടെ നനച്ചുകൊടുക്കുക. തൊഴുത്തിലേക്ക് ചൂടുള്ള കാറ്റടിക്കാതിരിക്കാന്‍ ചാക്ക് കൊണ്ടുമറയ്ക്കാം. മൂന്നു മണിക്കൂര്‍ ഇടവിട്ട് പശുക്കളുടെ പുറത്ത് വെള്ളം ഒഴിച്ച് നനയ്ക്കാം. കനത്ത ചൂടിനെ പ്രതിരോധിക്കാന്‍ കന്നുകാലികളുടെ തീറ്റക്രമത്തില്‍ മാറ്റം വരുത്താം. രാവിലെയും വൈകീട്ടും തീറ്റ നല്‍കുക. അന്തരീക്ഷ ഊഷ്മാവ് കൂടുതലുള്ള സമയത്ത് തീറ്റ നല്‍കുന്നത് കുറയ്ക്കുക. തീറ്റ നല്‍കുന്നതോടൊപ്പം നിശ്ചിത അളവില്‍ ധാതുലവണ മിശ്രിതവും നല്‍കുക.

അന്തരീക്ഷ ഊഷ്മാവ് കൂടുന്നതിനനുസരിച്ച് കന്നുകാലികളില്‍ അകിടുവീക്കം ഉണ്ടാകാനുള്ള സാധ്യത ശ്രദ്ധിക്കുക. പാലുല്‍പ്പാദനം കൂടുതലുള്ള പശുക്കളില്‍ ഗ്ലൂക്കോസിന്റെ അളവ് കുറയുന്നതു മൂലമുണ്ടാകുന്ന കീറ്റോസിസ്, കാത്സ്യക്കുറവു മൂലമുണ്ടാകുന്ന ക്ഷീരപ്പനി എന്നിവ ശ്രദ്ധിക്കേണ്ടതാണ്. രോഗപ്രതിരോധ ശേഷി കുറയുന്നതിനനുസരിച്ച് ന്യുമോണിയ, വയറിളക്കം, മഞ്ഞപ്പിത്തം, പട്ടുണ്ണിപനി എന്നിവ വരാനുള്ള സാധ്യതകള്‍ കൂടുതലാണ്. ഇത്തരം രോഗലക്ഷണങ്ങള്‍ കാണുകയാണെങ്കില്‍ അടിയന്തിര ചികിത്സ ലഭ്യമാക്കാന്‍ അടുത്തുള്ള മൃഗാശുപത്രിയെ സമീപിക്കണമെന്ന് ജില്ലാമൃഗസംരക്ഷണ ഓഫീസര്‍ അറിയിച്ചു.

Share.

About Author

നിങ്ങള്‍ ആയിരിക്കുന്ന സ്ഥലത്തെ വാര്‍ത്തകള്‍ കണ്ടെത്തി ഞങ്ങളെ അറിയിക്കുക വഴി നിങ്ങള്‍ക്കും ഒരു ജേര്‍ണലിസ്റ് ആകാം. മലയാളപത്രം.കോം 

Comments are closed.

Social Media Auto Publish Powered By : XYZScripts.com